လေကြောင်းခရီးသွားခြင်း တစ်စေ့ တစ်စောင်း

ကျွန်တော်က လယ်သမားမိသားစု က ဆင်းသက်ပြီး စိုက်ပျိုးရေး တက္ကသိုလ် တက်ခဲ့ဘူးတဲ့ တောသားအစစ်ဗျ၊ ငယ်ငယ်က လေယာဉ်ပျံ ဆိုတာ သိပ် စီးချင်တာ၊ လေယာဉ်ပျံ ကို ကောင်းကင်မှာတွေ့ရင် လိုက်ကြည့်တာ မျက်စိတစ်ဆုံးပဲ၊ ခရီးဝေးသွားရင် လေယာဉ်နဲ့ သွားရတယ် ဆိုတာတော့ သိတယ်၊ ဒါပေမဲ့ ကိုယ့်စရိတ်နဲ့က ပြည်တွင်းတင် ကိုပဲ လေယာဉ်နဲ့ သွားစရာ လမ်းမရှိဘူး။
ကံအားလျော်စွာ ကံအလွန်အင်မတန်ကောင်းပြီး ပြည်ပ သွားစရာ ကြုံတော့ ဘယ်သူ့ ကို အသေးစိတ်မေးရမှန်း မသိဘူး။ ဒါပေမဲ့လဲ ဖြစ်သွားတာပါပဲ။
ပထမဆုံး ပြည်တွင်းခရီး အကြောင်းလေး စပြောပြပါမယ်။
လေယာဉ်ကို ပြည်တွင်းခရီးအတွက် က အောက်ပါ အချက်လေးတွေ သိဘို့လိုပါတယ်။
- (၁) အမျိုးသားမှတ်ပုံတင် (သို့) နိုင်ငံသား စိစစ်ရေးကတ်(ဒီအချက်က ပြသနာ သိပ်မရှိဘူး)
- (၂) လေယာဉ် လက်မှတ် (ကြိုတင်ပြီး ဝယ်ထားရပါတယ်၊ ခရီးစဉ် လိုက်ပြီး ဈေးနှုန်းနဲ့ ဦးစားပေး အစီအစဉ်တွေ ရှိပါတယ်- လက်မှတ်ရထားလို့ ဆိုပြီး အဲဒီနေ့ အဲဒီအချိန် သွားခွင့် ရမယ် လို့ သာမန်အားဖြင့် မသေချာပါဘူး၊ လေယာဉ် ထွက်ခါနီးမှ ဆွဲချခံရတာ ရှိနိုင်ပါတယ်။ အဲဒါအတွက်လဲ ကြိုတင် ခန့်မှန်းထားဘို့ လိုပါတယ်)
- (၃)လေယာဉ် လက်မှတ်ဝယ်ထားပြီးရင် လေဆိပ်ကို သတ်မှတ်ချိန်(check in) မှာ ကွင်းကိုရောက်ပြီး သတင်းပို့ဘို့ လိုပါတယ်။
- (၄) သတင်းပို့ပြီးရင် လေယာဉ်ပေါ် တက်ခွင့်လက်မှတ်(boarding pass) တစ်စောင် ထုတ်ပေးပါတယ်၊ အဲဒါပြနိုင်မှ လေယာဉ်ပေါ် တက်ခွင့်ရမှာပါ၊
- (၅) လူဝင်မှု၊ အကောက်ခွန်၊ လုံခြုံရေး စတာတွေ ဖြတ်ကျော်ပြီးရင် ခရီးသွားမဲ့ သူတွေပဲ ထိုင်ခွင့်ရတဲ့ အခန်းမှာ ထိုင်စောင့် ပြီး လေယာဉ်ပေါ် တက်ဘို့ (ဝေးရင် ဘတ်စကား၊ နီးရင် ချေလျင်) အဆင်သင့်ပါဘဲ။
ပြီးရင်တော့ လေယာဉ်ပေါ်တက်ပြီး ခရီးစတင်ပါပြီ။
နဲနဲ ပြောဘို့ ကျန်သွားတာက ဝန်စည်စလယ် ကိစ္စ၊
သူက ၂ မျိုးရှိပါတယ်၊ လက်ဆွဲတန်ဆာ(hand carry) နဲ့ ဝန်စည်စလွယ်(luggage)
အဲဒီ ၂ မျိုးမှာ လဲ သူ့ စည်းကမ်းလေးတွေ ရှိပါတယ်၊ လက်ဆွဲမှာ ဘာတွေ မယူရဘူး၊ ဝန်စည်စလယ် က အလေးချိန် ဘယ်လောက်ထက် မပိုရဘူး ဆိုတာတွေပါ၊ လေယာဉ်စ ဘီးလှိမ့်ပြီ ဆိုရင် ထိုင်ခုံ ခါးပတ်ပတ်ထားဘို့ နဲ့ ဆေးလိပ်မီးညှိမ်းထားဘို့ သတိပေးပါတယ်။ ထိုင်ခုံခါးပတ် မပတ်တတ်ရင်လဲ ကိစ္စ မရှိပါဘူး၊ လေယာဉ်မယ် ချောချောလေးတွေက ကူညီပေးပါလိမ့်မယ်။ ကိုယ်ကတော့ သူတို့ကို ဘယ်လိုခေါ်ရမယ် ဆိုတာသိဘို့ လိုတယ်လေ။ ခေါင်းပေါ်တည့်တည့်က စာကြည့်မီးလေးတွေနဲ့ လေအေးပေါက် ဘေးက ခလုပ်ကလေးနှိပ်လိုက်ရင် အပြေးရောက်လာမှာပါ။ လေယာဉ်က အတက်အဆင်းမှာ လေယာဉ်အတွင်းလေဖိအားပြောင်းတဲ့ဒဏ် သက်သာဘို့ အတွက် သကြားလုံးလေးတွေ ဝေပေးလေ့ ရှိပါတယ်၊ မိမိလိုသလောက် ယူလိုက်ယုံပါပဲ။ လေယာဉ်ပျံ လေဟုန်စီးပြီး ပျံသန်းနေချိန်မှာတော့ အဆာပြေ ကော်ဖီ၊ မုန့်၊ ရေ စတာတွေကို အခမဲ့ တိုက်ကျွေးလေ့ ရှိပါတယ်။ ကျနော်လဲ နောက်မှ သိတာ အလကားကျွေးမှန်း။ ပိုက်ဆံ ပေးရမယ် မှတ်လို့ မစားရဲခဲ့ဘူး။(တိုးတိုးနော် လူကြားရင် ရှက်စရာကြီး)
လေယာဉ်က သတ်မှတ်ခရီးစဉ် ရောက်ခါနီးရင် ကြိုတင် ကျေညာပေးပါတယ်၊ "ကျေးဇူးပြု၍ နားဆင်ပါရှင်-ကျမတို့ ခရီးစဉ်အမှတ် ဘယ်လောက် ဘယ်လောက် လေယာဉ်ဟာ၊ ဘယ်မြို့ကို ဘယ်အချိန်မှာ ဆင်းသက်ပါတော့မယ်။ ခရီးသည်များ မိမိတို့ထိုင်ခုံခါးပတ်များ ပတ်ထားကြပါရန်နဲ့ ဆေးလိပ်မီးများ ညိမ်းသတ် ထားကြပါရန် ပန်ကြားအပ်ပါတယ်၊ ကျေးဇူးတင်ပါတယ်ရှင်" ဆိုတဲ့ အသံနဲ့ အတူ မကြာခင်မှာ လိုရာခရီးရောက်ပါပြီ။ လေယာဉ်ပေါ်က ဆင်းပြီးရင်တော့ ပြသနာ သိပ်မရှိပါဘူး၊ သူများလုပ်သလို လိုက်လုပ်လိုက်ရင် အဆင်ပြေပါတယ်။ ကိုယ့် ပစ္စည်းကို ရွေ့လျားနေတဲ့ စက်ခါးပတ်(Conveyer Belt)မှာ သွားကြည့်ပြီး တွေ့ရင် ကောက်ယူပြီး အပြင်ထွက်သွားယုံပါပဲ။ ပစ္စည်းပါမလာရင်တော့ ပြသနာနဲနဲ ရှိတယ် ဘုန်းပြည့်စုံ ကတော့ ကံကောင်းတော့ မကြုံဘူးသေးဘူး။
ဒါလောက်ဆို ဖတ်ရတာ ပျင်းနေလောက်ပါပြီ နောက်တစ်ခေါက်ကျမှ ထပ်ရေးဦးမယ်လေ။